అంకెలు అదృష్టాన్ని అందిస్తాయా?

శాస్త్రమునెల్ల చదివి విజ్ఞాన మెరిగి 

సంశయింపక సర్వధా చర్చ జేసి 

నిజమెరుంగ వలయు  ఇది నేర్వకున్న 

మూఢ విశ్వాసమున జేటు ముడుచుండు !!

అని కవిరాజు త్రిపురనేని రామస్వామి గారు ఏనాడో హెచ్చరించారు. హేతుబద్ద రహిత సమాజంలో మూఢ విశ్వాసాలనే కలుపు మొక్కలు నిరంతరం మొలుస్తూనే ఉంటాయి. వీటిని ఎప్పటికప్పుడు నిర్మూలిస్తూనే ఉండాలి. వీటి వేళ్ళు  సమాజంలో చాలా లోతుగా పాతుకు పోయి ఉన్నాయి. పాతవి పోగొడుతుంటే కొత్తవి చిగురేస్తూ ఉంటాయి. అలాంటి కొత్త తరం విశ్వాసాలలో ఒకటే ఈ " అంకెలు పై నమ్మకం ". న్యూమరాలజి అనే ఈ ' సంఖ్యా జ్యోతిషం'  సంఖ్యలను ఉతంగా చేసుకొని అమాయకులకు సంఖెళ్ళు వేస్తున్న వైనం విస్తుగోల్పుతుంది. 

గణిత శాస్త్రంలో ప్రాధానమైన అంకెలు తొమ్మిది. మన భారతీయులు కనిపెట్టిన శున్యాంకం వల్ల ఎంత పెద్ద సంఖ్య అయిన సులభంగా రాసే వెసులుబాటు వచ్చింది. గణితం సకల శాస్త్రాలకు మాతృ స్థానం. సంఖ్యా గణితం - దాని ఘనత, విజ్ఞాన శాస్త్రంలో సుస్పష్టమైన పాత్ర మనకందరికీ తెలిసిన విషయమే. అటువంటి గణితాన్ని గతి తప్పించి వంచానావిధ్యగా మార్చారు. గణిత సమస్యలకు సమాదానం చెప్పే క్రమములో ఉపయోగించే సంఖ్యలకు అద్బుతమైన శక్తి ఉందనే భ్రమలో రూపొందించిన ఉహా గణితమే ఈ సంఖ్యా జ్యోతిష్యం. దీనిలో బోడిగుండు కి మోకాలికి ముడివేసే విచిత్ర లెక్కల సిద్దాంతం ఉంది. 

              జ్యోతిష్యం లో ఉండే నవ గ్రహాలకు (?) గణితంలో ఉండే తొమ్మిది అంకెలకు అనుసంధానం చేసి అదృష్ట ఫలాలు సృష్టించి ఒక కొత్త కుహనా శాస్త్రానికి ప్రాణం పోసారు.  పాలలో వెన్న దాగి ఉన్నట్లు అంకెలలో అద్బుతమైన శక్తి ఉందనే నమ్మకమే దీనికి ఊపిరి. ప్రతి సంఖ్యను దానిలో ఉండే అంకెలను కుడితే  మనకు ఒకటి నుండి తొమ్మిది వరకు గల ఏదో ఒక మూల సంఖ్య వస్తుంది. ఉదాహరణకు 786 అనే సంఖ్య ను కూడితే (7+8+6) మనకు 21 అనే అంకె వస్తుంది, దానిని మరల కలిపితే (2+1) మూడు అంకె వస్తుంది. ఇలా ప్రతి సంఖ్యను ప్రధాన సంఖ్యగా మార్చటం, దాన్ని బట్టి మంచి చెడులు చెప్పటం ఈ శాస్త్రమూల సిద్దాంతం. దీన్ని మానవులకు వర్తింప చేయటానికి ఇంగ్లీషు పుట్టిన రోజు ప్రామాణికంగా తీసుకుంటారు. ఉదాహరణకు 15-6-1960 అనే తేదిలో అంకెలు కూడితే వచ్చే అంకె ఒకటి. ఇలా ప్రతి వ్యక్తి పుట్టిన తేదిని మూల సంఖ్యగా మార్చి ఫలితాన్ని చెప్పవచ్చు. 

             అలాగే ప్రతి వ్యక్తికి ఒక పేరు ఉంటుంది, దానిలో అక్షరాలూ ఉంటాయికదా ! ఎన్ని ఉంటాయో లెక్కించవచ్చు. ఇలా  అక్షరాలకు అంకెలకు అవినాభావ సంబంధం ఉందనేది దీనిలో దాగిఉన్న మరో  మర్మం.  దీని ప్రకారం వ్యక్తి పేరును ఆంగ్ల అక్షరాలలో రాసి దాని ప్రకారం మూల అంకెను లెక్కించాలి.  ఉదాహరణకు ఆంగ్లంలో A  మొదటి అక్షరం కాబట్టి దీని సంఖ్య ఒకటి, అలాగే B కి రెండు ...,Z కు 26, ఇలా పేరులో ఉన్న అన్ని అక్షరాలకు అంకెలు జత చేసి వాటిని కూడితే మరల  ఒక మూల అంకె వస్తుంది. ఇప్పుడు పుట్టిన తేది కుదించగా వచ్చిన అంకెతో  పేరు బల అంకె తోడు-నీడగా ఉంటుంది.  ఈ రెంటికి లంకె కుదరాలి. అలా జత  కుదరక పోతే గ్రహాలకు పొత్తు కుదరదట.  పుట్టిన తేది మార్చటం కుదరదు కాబట్టి వ్యక్తి పేరులో కొత్తగా కొన్ని అక్షరాలను జోడించటం గాని లేదా తోలిగించటం వలన జత కుడే అంకె సాధిస్తారు. కొత్త పేరుతో గ్రహాల మధ్య సఖ్యత కుదిరి సౌఖ్యం సిద్దిస్తుందట. ఇలా పెట్టిన పేరు ఫలితాన్ని ఇవ్వాలంటే సదరు వ్యక్తి ఆ పేరును 108 సార్లు రామకోటి రాసినట్లు నెలపాటు రాయాలట. ఇలాగే దివాలా తీసిన పరిశ్రమలు/ వ్యాపార సంస్థలు పేరు మార్చుకుంటే లాభాల బాట పడతాయట. 
అప్రాచ్చుతుల నుండి దిగుమతైన ఈ కొత్త పిచ్చి ఇప్పుడిప్పుడే మన సమాజంలో చాప కింద నీరులా వ్యాపిస్తుంది. చానళ్ళలో ప్రకటనలు కుడా వెల్లువెత్తుతున్నాయి.  

పాత జ్యోతిష్యం జన్మదినం బట్టి పేరులో మొదటి అక్షరం ఎలా ఉండాలో చెబితే ఈ సంఖ్యా జ్యోతిష్యం పేరులో ఇంగ్లీషు అక్షరాలూ ఎలా ఉండాలో చెబుతుంది. ఈ రెంటికి మధ్య పేర్లు పచ్చడి పచ్చడి అవుతున్నాయి. 

             మానవ జీవితాలపై గ్రహాల ప్రభావం శూన్యం అని విజ్ఞాన శాస్త్రం ఘోషిస్తూ ఉంటే కొత్తగా న్యూమరాలజీ పేరుతో అదృష్ట సంఖ్యలు అంటూ కొత్త నమ్మకాలు ఏర్పరుచుకోవటం వివేకవంతమైన పని కాదు. కల్పనకు  వాస్తవానికి ఎంత వ్యత్యాసం ఉందొ అంతే వ్యత్యాసం గణిత శాస్త్రానికి ఈ గుణిత సంఖ్యా శాస్త్రానికి ఉందని తెలుసుకోవాలి .  ఎండమావిలో నీరు ఉందనేది  ఎంత భ్రమో  అంకెలు  అదృష్టాన్ని అందిస్తాయనేది కుడా అంతే  భ్రమ.  

            అలాగే ఈ న్యూమరాలజీ వంట పట్టించుకున్న వారు తమ కొత్త వాహానాలకు కావలిసిన లక్కి నెంబర్ కొరకు తీవ్రమైన పోటీ పడుతున్నారు. మంచి జరగాలంటే యజమాని పేరును బట్టి ఏ నెంబరు బండికి ఉండాలో చెబుతారట. ఇక్కడ మంచి అంటే బండికి ప్రమాదం జరగక పోవటమే. ఇది డ్రైవర్ జాగరూకతను బట్టి ఉంటుంది కాని నెంబర్ ప్లేట్ బట్టి కాదుగా! కొంతమందికి తొమ్మిది అంకె తో ఉన్న వాహనం కలిసివస్తుందట. తొమ్మిదంటే చాలా మందికి పిచ్చి వ్యామోహం, తొమ్మిది అంకెతో ఉన్న వాహనాలు సురిక్షితం అన్న గణాంకాలు ఏవి కానరావు. అలాగే ఎటు కూడినా తొమ్మిది వచ్చేలా తొమ్మిది గళ్ళ జంత్రి (3X3) ని రాగి రేకుపై ముద్రించి అదృష్ట యంత్రం పేరుతొనో, తాయుజు పేరుతోనో అమాయకులకు అంటగట్టే  అవారాగాళ్ళు కూడా ఉన్నారు. గణితంలో తొమ్మిది అంకెతో అనేక గమ్మతులు కాగితంపై చేయవచ్చు కాని నిజ జీవితంలో చేయలేమన్న విషయాన్ని గ్రహించాలి. 

అలాగే ఈ సంఖ్యా శాస్త్రంతో సంబంధం లేకుండా కొన్ని సంఖ్యలు అచ్చిరావనే భావన దాదాపు  అన్ని సమాజాలలో పాతుకుపోయింది. చైనా లో నాలుగు అంకెను 'సీ' అని పలుకుతారు , సీ అంటే చైనా భాషలో మరణం అని  అర్ధం  కాబట్టి వారికి 'నాలుగు'  అంకె అంటే భయం.   క్రీస్తు చివరి విందులో పాల్గొన్న వ్యక్తులు 13 మంది కాబట్టి క్రైస్తవులకు 13 అంకె అంటే కలవరం. అలాగే హిందువులకు 8, 18 , 108 సంఖ్యలంటే  భక్తి , 3 మరియు 7 అంకెలతో పాటు అష్టమి (8), నవమి (9) అనే తిధులు అంటే భయం. ముస్లింలకు ఖురాన్ మొదటి వాఖ్యంకు సంఖ్యా రూపం అయిన 786 అంటే భక్తి భావం, 13 మరియు 14 అంటే భయం గుడుకట్టుకొని ఉన్నాయి. అంకెలపై ఇలాంటి అర్ధం లేని అపోహలు, ఆశ భయాలను ఎంత త్వరగా త్వజిస్తే అంత త్వరగా అభివృద్ధి చెందగలం.